Geiriau Doeth

Dysgu

geiriaudoeth — Wed, 20 May 2009 14:05:32 +0000

Mae gen i ryw chwilen yn fy mhen mai doeth fyddai newid teitl y blog hwn i ‘Nodiadau Blogio i Amaturiaid’ (‘Idiot’s Guide to Welsh Blogging’, for the sake of our English friends!). Iawn, rydw i wedi gallu creu blog, sgrifennu blog, creu dolenni, dyfynnu pennill, ychwanegu calendr a blwch ‘chwilio’, nawr dwi am drio ychwanegu llun.

Felly, dyma fo! Rhywbeth bach i ddathlu’r ffaith fod yr haul yn gwenu arnom heddiw, yn dilyn y glaw mawr ddoe.

Cyfnewidiol!

geiriaudoeth — Tue, 19 May 2009 14:33:19 +0000

Pan fo dyn yn rhedeg allan (idiom Saesneg, sori!) o bethau i’w dweud, mae’r tywydd fel arfer yn bwnc trafod da. A gan fy mod i’n newydd i’r byd blogio hwn, pa well ffordd o dorri’r ia na sôn am y tywydd?!

Tri pheth sy’n anodd nabod, medd yr hen ddihareb, ac yn sicr, y mae’r tywydd yn un ohonynt. Yma (yng ngogoniant Cymru fach) mae’n heulog braf un funud, a’r nesaf yn ei harllwys hi.

O wel …

Daw hyfryd ddydd Mehefin cyn bo hir,
A chlywir y gwcw’n canu’n braf yn ein tir.
Braf yn ein tir, braf yn ein tir,
Gwcw, gwcw, gwcw’n canu’n braf yn ein tir!

O.N. Tasg ar gyfer y blogiad nesaf … ychwanegu llun! Www, cyffrous!

Am olwg!

geiriaudoeth — Mon, 18 May 2009 20:33:44 +0000

Ie, testun sgwrs y byd Cymraeg oddi ar ddiwedd yr wythnos ddiwethaf yw Golwg 360, y wefan Gymraeg ei hiaith sy’n ennill nawdd o £20,000. Gŵyr pawb erbyn hyn mae’n siŵr am y diffygion, y gwendidau, a’r embaras mae’r criw sy’n llywio’r wefan yn sicr yn teimlo.

Af i ddim i ymhelaethu ymhellach, dim ond nodi ambell linc diddorol, pe byddech chi am bori rhagor i’r hanes!

Croeso go-iawn!

geiriaudoeth — Thu, 14 May 2009 21:39:22 +0000

Un peth yw gosod gwefan ar ei thraed, peth cwbwl wahanol yw sicrhau cynnwys boddhaol i’r wefan honno! Felly, dyma air byr i’ch croesawu chwi, syrffwyr hoff, i safle ‘Geiriau Doeth’.

Wn i ddim eto beth fydd hyd a lled y blog hwn (hwn? ie, gwrywaidd yw blog, mae’n siŵr?), ond gobeithio y caf ysbrydoliaeth wrth fynd ymlaen. Does dim arwyddocâd i’r enw ychwaith – rhywbeth syml a ddaeth i’r meddwl wrth i mi gael fy nghymell i greu blog.

Felly, does gen i ddim disgwyliadau mawr ohonof fi fy hun nac o’r wefan hon. Peidiwch chwithau, da chwi, â chodi’ch gobeithion ychwaith! Mae sôn bod Golwg 360 yn lansio yfory; wel, yn sicr, nid rhywbeth i’w gystadlu â’r wefan aruchel (gobeithio!) honno yw’r blog hwn!!

Ta-ta tan toc!

Croeso!

geiriaudoeth — Tue, 12 May 2009 19:00:09 +0000

Croeso i safle Geiriau Doeth!